“Doqquz dinc sakinin ölümünə səbəb olan Ermənistan Silahlı Qüvvələrinin Gəncəyə raket hücumu hansısa təsadüfi hərbi səhv ola bilməzdi – bu, İrəvan tərəfindən planlaşdırılmış terror aktı və ya hərbi cinayətdir”.

Bu barədə “Milli Müdafiə” jurnalının baş redaktoru İqor Korotçenko bu gün “Vestnik Kavkaza” nəşrinin müxbiri ilə söhbəti zamanı bildirib.

“Bu, sadəcə, öhdəliklərinin kobud şəkildə pozulması deyil (Ermənistan tərəfindən atəşkəs sazişinin imzalanmasından bir gün sonra), şərhdən asılı olaraq ya hərbi cinayət, ya da beynəlxalq terror aktıdır.

Bu zərbənin nə ilə xüsusi olduğunu başa düşmək vacibdir. Döyüş əməliyyatları artilleriya və ya yaylım atəş sistemlərinin köməyilə həyata keçirildikdə hətta atəş hərbi hədəflərə yönəlsə də, mərmilərin sapması səbəbilə qeyri-hərbi hədəflərin də məhv olması mümkündür. Ancaq Gəncəyə düşənlər kimi ballistik raketlərə uçuş tapşırığı təqdim edilir, zərbənin endiriləcəyi yerin koordinatları əvvəlcədən yazılır.

Yəni Gəncəyə edilən bu hücum Ermənistanın hərbi rəhbərliyi tərəfindən planlaşdırılıb, təsdiqlənib və icazə verilib”, - deyə İ.Korotçenko bildirib.

“Beləliklə, şübhə yoxdur ki, Ermənistanın hərbi-siyasi rəhbərliyi məhz Azərbaycanın böyüklüyünə görə ikinci şəhərinin yaşayış rayonuna zərbə endirmək niyyətində olub.

İrəvan həyasızcasına Azərbaycanın dinc əhalisinə qəsdən hücumlar təşkil etməklə Azərbaycanla imzalanan atəşkəsi, əslində, məhv etdi. Buna haqq qazandırmaq olmaz, araşdırmaq və hücumu təşkil edənləri beynəlxalq məhkəməyə cəlb etmək lazımdır. Hələ də qalmasına baxmayaraq, sülh şansları çox azdır”, - İqor Korotçenko vurğulayıb.

“Ali Aaş Komandan olaraq bu raket zərbələrinin müəllifinin Nikol Paşinyanın özü olub-olmadığı və ya qərarın onsuz verildiyi sualına aydınlıq gətirmək lazımdır. İkinci ssenari onun ordudakı vəziyyətə nəzarəti itirdiyini göstərir.

Əgər raket hücumu üçün icazə birbaşa Paşinyan tərəfindən verilibsə, o, Nürnberqdə beynəlxalq tribunalda İkinci Dünya Müharibəsində etdiklərinə görə cavab verən insanlardan fərqlənmir. Əgər Paşinyan belə bir əmr verməyibsə, sual yaranır ki, indi Ermənistan ordusunun fəaliyyətlərində heç olmasa, nə isə ondan asılıdırmı? Bu cinayətkar əmri kimin verdiyini öyrənmək lazımdır”, - deyə “Milli Müdafiə” jurnalının baş redaktoru diqqət çəkib.

“Nəticə etibarilə bu, təsadüfi bir raket zərbəsi deyil və heç bir “özünümüdafiə bölməsinin” hücumları deyil. İxtisassız personal bu cür silahları prinsipcə istifadə edə bilməzlər. Raketlər birbaşa Ermənistanın silahlı qüvvələri tərəfindən atılıb və yalnız hərbi-siyasi rəhbərliyin üzvlərindən kimin əmr verdiyini araşdırmaq qalır - ya Paşinyan, ya da müdafiə naziri Tonoyan”, - deyə hərbi ekspert fikrini tamamlayıb.