Türkiyənin Milli Müdafiə naziri Hulusi Akar və Baş Qərargah rəisi general Yaşar Gülər dünən Liviyaya etdikləri səfər zamanı Qətərin Baş nazirinin müavini və Müdafiə naziri Xalid ibn Məhəmməd əl-Atiyyə və Liviya Müdafiə nazirinin müavini Səlahəddin ən-Nemruş ilə görüşüb.

GununNebzi.az xəbər verir ki, Xəlifə Haftara qarşı Liviya qanuni hökumətinə dəstək verməyə davam edən Türkiyə Misrata şəhərində dəniz bazası yaratmağa hazırlaşır.

Türkiyə Milli Müdafiə Nazirliyinin verdiyi məlumata görə, ötən gün türk generallar bununla bağlı Qətər və Liviya hökuməti ilə hərbi əməkdaşlıq müqaviləsi imzalayıb.

Razılaşmaya əsasən, Qətər qurulacaq hərbi təlim mərkəzlərini maliyyələşdirəcək. Misratada isə üçtərəfli koordinasiya mərkəzi qurulacaq, Türkiyə burada hərbi baza yaradacaq.

Misrata limanının və hərbi hava bazasının da Türkiyə Silahlı Qüvvələrinin istifadəsinə təqdim ediləcəyi bildirilir.