Azərbaycan Demokratiya və Rifah (ADR) Hərəkatına və respublikanın təhsil ictimaiyyətinə ağır itki üz verib. Təhsil eksperti, Azad Müəllimlər Birliyinin keçmiş sədri, ADR sədrinin demokratik təsisatlarla iş üzrə müavini, filiolgiya üzrə fəlsəfə doktoru Məlahət Mürşüdlü vəfat edib.

Məlahət xanım Əbülfəz Elçibəyin prezident seçkilərində Tovuz rayonunda səlahiyyətli nümayəndəsi olmuşdur. O 1992-ci ildə "Təhsil qanunu"nun hazırlanmasında və qəbul edilməsində fəal iştirak edib, onun təkmilləşməsinə və icrasına daimi töhfələr verib.

Məlahət Mürşüdülü 1992-ci ildən 2015-ci ilədək Müsavat partiyasının üzvü olmuş, Məclis üzvü seçilmiş, “Azadlıq ” blokunun vahid namizədi kimi 2005-ci ildə keçirilən parlament seçkilərində iştirak etmişdir.

Məlahət Mürşüdlü Azərbaycan Demokratiya və Rifah (ADR) Hərəkatının yaradıcılarından biri, 2015-ci ildən Hərəkatın İdarə Heyətinin üzvü idi.

Məlahət xanım Azərbaycan pedaqoji fikir tarixinin öyrənilməsi, təbliği, təhsilin dünya təhsil sisteminə
inteqrasiyası istiqamətində fəaliyyət göstərən tədqiqatçı-ekspert və fəal ictimaiyyətçi idi. O, ictimai-siyasi fəaliyyətini ADR Hərəkatında şərəflə davam etdirməklə, daim yeniləşən təşəbbüsləri və tükənməz enerjisi ilə demokratiya uğrunda apardığı mübarizədə hər kəsin rəğbətini qazanmış və sevilən şəxslərdən olmuşdur.

ADR ailəsi olaraq, hər birimiz üçün əziz və dəyərli olan Mələhət Mürşüdlünün vəfatı xəbəri bizi son dərəcə kədərləndi. Bu əvəzsiz itki ilə əlaqədar Mürşüdlülər nəslinin bütün üzvlərinə dərin hüznlə başsağlığı verir, səbr diləyirik.

Məlahət xanımın heyranlıqla və həsrətlə xatırlayır, onun xatirəsini ehtiramla yad edirik. Qəbri nurla dolsun! Allah rəhmət eləsin!

Qubad Ibadoğlu, ADR Hərəkatının rəhbəri