İran Prezidenti İbrahim Rəisinin və digər rəsmi şəxslərin həlak olduğu helikopter qəzasının əsas səbəbi kimi bölgənin mürəkkəb iqlim və atmosfer şəraiti göstərilib.

Bu barədə helikopter qəzasının səbəblərini araşdıran Ali Komissiyanın yekun hesabatı dərc olunub.

Hesabatda deyilir ki, yaz aylarında, birdən-birə sıx duman kütləsi hündürlüyünə doğru yüksəlib və nəticədə helikopter dağa çırpılıb.

Hesabatda o da qeyd edilir ki, qəzaya uğrayan helikopterin texniki, mühəndislik, elektron və naviqasiya şəraiti diqqətlə ekspertizadan keçirilib və nəticə alınıb.

Eyni zamanda, son 4 ildə helikopterin təmiri ilə bağlı sənədlərə də ekspertlər tərəfindən baxılıb və görülən işlər zamanı heç bir problem müşahidə olunmayıb.

Təbrizdən Ağbənd körpüsünə, Qız Qalası bəndinə və oradan Təbriz Neft Emalı Zavoduna gedən uçuş xəritələri mütəxəssislər tərəfindən diqqətlə yoxlanılıb və helikopterin proqnozlaşdırılan marşrut üzrə hərəkət etdiyi və bu marşrutdan kənara çıxmadığı müəyyən edilib.

Helikopterin qalan hissələri və sistemləri (yəni mühərrikləri, enerji ötürücü və yanacaq sistemləri, elektron avadanlıqlar, elektro və ya unikal) Müdafiə Nazirliyinin Aviasiya Sənayesi Təşkilatının ekspert və mütəxəssisləri tərəfindən sınaqdan keçirilib və helikopterin düşməsinə təsir edən heç bir qüsur aşkar edilməyib.

Meteorologiya Təşkilatının qəza baş verdiyi gündən olan hesabatları, yəni cari hava şəraiti və qeyri-sabit hava şəraiti ilə bağlı xəbərdarlıqlar baş vermiş şəraitə uyğun olaraq ekspertlər tərəfindən araşdırılıb.

Məhkəmə Tibbi Texniki Komitəsinin araşdırma hesabatına görə həlak olan şəxslərin bədənlərində aparılan toksikoloji və patoloji müayinələrin nəticələrində şübhəli hal aşkarlanmayıb.

Helikopterin hissələri və sistemləri ekspert tərəfindən yoxlanılıb, hissə və sistemlərdə təxribat əlamətləri aşkar edilməyib.

Helikopterin hücum və müdafiə sistemləri, elektron müharibə, maqnit sahəsinin və lazerin yaradılması ehtimalı ekspert və mütəxəssis tərəfindən yoxlanılıb və qeyd olunan halların qəza baş verməsinə hər hansı müdaxiləsi istisna edilib.

Bütün hallar və ətraflı ekspertiza, ixtisaslaşdırılmış araşdırmalar və onların nəticələrini nəzərə alaraq Silahlı Qüvvələrin Baş Qərargahının Ali Ekspert Şurasının yekun rəyi belədir: “Helikopterin qəzaya uğramasının əsas səbəbi kimi bölgənin mürəkkəb iqlim və atmosfer şəraiti, yaz aylarında, birdən-birə sıx duman kütləsinin hündürlüyünə doğru yüksəlməsi və helikopterin dağla toqquşması göstərilib”.

Qeyd edək ki, göyərtəsində İbrahim Rəisi və digər rəsmi şəxslərin olduğu helikopter bu il mayın 19-da İran ərazisində qəzaya uğrayıb. Prezident İbrahim Rəisi, xarici işlər naziri Hüseyn Əmir Abdullahian və daha bir neçə rəsmi şəxs qəzada həlak olub./APA