Koronavirusa yoluxma riskini azaltmaq üçün insanlar antiseptiklərdən daha çox istifadə etməyə başlayıb. Bəziləri yarım saatdan bir dezinfeksiyaedici məhluldan istifadə edir, hətta üzlərini də bu vasitə ilə silirlər. Lakin bütün dünyanın tibb işçiləri antibakterial gel və ya spreyi sabunla əvəzləmək barədə çağırış edirlər.

Antiseptiklər hansı təhlükəni daşıyır, su və sabun mikroblarla mübarizədə niyə iki dəfə daha effektivdir?

Media.Az bu suallarla Kliniki Tibbi Mərkəzin toksikologiya şöbəsinin müdiri, Azərbaycan Səhiyyə Nazirliyinin baş toksikoloqu Azər Maqsudova müraciət edib.

Onun sözlərinə görə, əl üçün dezinfeksiyaedicilər spirtin yüksək konsentrasiyası səbəbindən təhlükəli ola bilər. O, dəriyə təmas edərkən allergik reaksiyalara, xüsusi həssas insanlarda isə dermatitə gətirib çıxara bilər.

“Ölkəmizdə sanitayzerlər əsasən iki növdür: spirt və bitki yağları (məsələn, evkalipt, yəni daha üzvi) əsaslı. Əlbəttə ki, hipoallergikliyinə görə, xüsusən də uşaqlar üçün üzvi olanlardan istifadə edilməsi tövsiyə olunur. Uşaqlarda spirt məhlulundan hətta bir dəfə istifadə etdikdən sonra allergik səpkilər və bununla bağlı ağırlaşmalar başlaya bilər.

İnsanlar tez-tez 90 faizlik spirtdən istifadə edirlər - o, dərini qurudur və zədələyir, bu da bədənin səthini infeksiyaya qarşı daha həssas vəziyyətə gətirir.

İmkan varsa, əli sabunla yumaq daha səmərəli və təhlükəsizdir. Spirtli antiseptiklərdən zəruri hallarda və tərkibində az miqdarda alkoqol olduğu halda istifadə edilməlidir”, - deyə A.Maqsudov qeyd edib.

Doktor həmçinin, mənşəyi bilinməyən antiseptiklərdən (məsələn, ictimai yerlərdə) istifadə olunmasını tərkibi naməlum olması səbəbindən tövsiyə etmir.

“Məhlulun tərkibində fərdi dözümsüzlük yaradan və allergik reaksiyalarla nəticələnən komponentlər ola bilər”, - deyə həkim bildirib.

Onun sözlərinə görə, bu günə qədər sanitayzerlərdən zəhərlənmə ilə bağlı şikayətlər qeydə alınmayıb. Lakin A.Maqsudov bunu istisna etmir:

“Spirtli məhlullara tənəffüs orqanları xəstəlikləri ilə əlaqədar kəskin spirt qoxusuna həssas olanlar, xüsusən də uşaqlar risk qrupundadır. Bu tip insanlara üzvi sanitayzerlərdən istifadə etməyi və mümkün olduğu qədər əlləri adi qaydada sabunla yumağı tövsiyə edirəm”.

Toksikoloq bəzi vətəndaşların dezinfeksiya etmək və özlərini virusdan qorumaq üçün maskaya spirt hopdurduqlarını söyləyib. O, bu cür hərəkətləri mənasız və hətta zərərli adlandırıb.

“Spirt buxarı ilə nəfəs almaq təhlükəlidir. Bu vəziyyətdə mikrob və virus əleyhinə təsir olmayacaq, yalnız əbəs yerə tənəffüs sistemini qıcıqlandıracaqsınız”, - deyə Azər Maqsudov vurğulayıb.